مين العبيط اللى قال الرجالة مبتعيطش ؟؟
أبويا ؟ خالى ؟ عمى ؟ كلهم قالوها و الدمعة فى عينهم مبتسقطش
خافوا تتهز الصورة اللى فى خيالنا و ساعتها الصورة متتعوضش
مع إن انا و انت و هم عيطنا أما شبعنا عليها و بننكر و نقول فطش
قطعنا المخدة و صرخنا من الوحدة و كرهنا فراقهم و دموعنا مبتسكتش
بنسأل ليه و نتعصب على أخطأنا و ننسى إن الملايكة بس مبتغلطش
بنقع من على أول مرجيحة و دموعنا تنزل ننضرب كمان عشان منعيطش !!
بتحط وشك فى السبورة و عينك من الخوف مكسورة و تتشحتف بس متعيطش
حتقف على باب أودتها و الدكاترة فى كل حتة و أب يقولك إمسك نفسك الراجل ميعطش
حتدفن صاحبك اللى عاشرته اللى ملكش فى مكان غير سيرته و تقفل قبره و متعيطش ؟
حتسيبك و من غير أسباب حتسد فى وشك كل باب لسه دموعك مبتخلصش
حتفضل واقف مستنى بره لحد ماتسمع صوته أول مرة إنزل يابن آدم من على العرش
إبنك أهه فى حضنك من قبل مايتكلم و بيبكى مين بقى اللى قال الرجالة مبتعيطش ؟؟
عبقرية...الغريب ان المبدأ ده بيجردنا من إنسانيتنا بالتدريج...وبيموت فينا الحياة واحنا مش حاسين..
ردحذفبس الكلمة دي بتتقال للولاد الصغيرة عشان ميطلعوش سيس زيادة عن اللزوم..فبتنفع :D