بقالي اسبوع عندي شغل مكثف في ايام متتالية و من كتر الضغط و التركيز كسلت احلق دقني قلت اسيبها تطول و خلاص، فات بتاع عشر ايام و دقني فعلا طولت اوي .. المهم وصلت ليوم الجمعة امبارح و قلت ايه البس هدومي عشان انزل اصلي، فين ايه البس قميص ولا تي شيرت في الجو الغريب ده المهم جبت اي تي شيرت مطبقة في وشي و لبستها و انا عالسلم .. نازل و لسه حخرج من العمارة لاقيتها تي شيرت سوبرمان بتاعتي .. قلت فل يعني مش دي القضية انا رايح اصلي و هدومي كويسة
تعلالي بأه في اللي جاي ده .. من ساعة ما خرجت من باب العمارة لحد الجامع و الناس بتبصلي ولا كأني نازل بلبوص، انا مش فاهم فيه ايه و مش حمشي الطش في ام الناس كلها .. كملت و قعدت وسط الناس في الشارع في مكاني على الحصيرة كالمتعاد حتى استمع للخطبة
فين و فيييين لما خدت بالي ان فيه شاب ملتحي دخل علينا و بصلي بنظرة الازبهلال الاورجواني و بحط ايدي على وشي ادركت ان دقني غالبا اطول منه .. فا قلت في عقل بالي ساعتها اكييييييد لأ .. اكيد موصلناش لسه للتفاهة دي .. هما زعلانين مني عشان انا دقني طويلة و لابس تي شيرت سوبرمان ؟؟؟
قمنا للصلاة و بعد الانتهاء منها كنت ولا عصام شرف لو راح قنا، فرد فرد في الزاوية يجيلي و انا بلبس ام الزفتة الجزمة و اللي يزيد الموضوع انه عندي سبحة صغيرة في العادي انا ماشي بيها اساسا فا طبعا كل الناس بأه ايه جاية تفتي.
١ – رجل عجوز شايف انه يابني ليه متلبسش لباس الحق ( الجلابية ) اقوله ايه ده ؟؟ ده منظر واحد يلبس جلابية مع كامل احترامي لاصحاب الرداء و فضل الرداء في الصيف و الحر .. بس انا مبحبهاش
٢ – راجل معاه ابنه فرحانين اوي انه عادي يعني سلفي و بيلبس سوبرمان و اكيد حافظ القرآن كمان فا ابو الولد كان مبسوط و سعيد و ابنه مبقاش بيخاف من الراجل ابو دقن الحمد لله
٣ – شاب قاللي بيس
٤ – شاب بصلي ازبهلال ارجواني تاني و مشي
٥ – طفل صغير اصر اني اعديه الشارع عشان خايف يعدي لوحده
بعد ما وصلت للبيت قعد افكر .. احلق دقني ولا اسيبها .. و القرار كان اني حسيب دقني و البس هدومي عادي انا معنديش بنطلون بيبين لباس و معنديش قمصان محزقة ولا تي شيرتات عليها ستات عريانة ولا جزمة اميجو بتنور، طب ليه لأ ؟؟ ما افضل سايب دقني و البس محترم و عادي زي كل الناس مش يمكن كده اقدر اوصل رسالة انه الملتحي ده بني آدم مش عفريت و لو ان فيه منهم عفاريت بيبصوا بصة الازبهلال الارجواني
الاسلام يا خوانا جماله انه ملوش وسيط يعني منك لربنا، اي طرف تالت او واسطة تملي عليك الحق ليس له الحق بالامر و النهي عليا خلاص هو له ينصحني و يقول كلمته و شكرا .. بعد كده انا حسابي مع ربنا .. دقني طويلة معنديش دقن المهم اني بحترم الناس في الشارع .. طب ده فيه واحد راجل لابس بأه جلابية و دقنه نصر متر و كسر عليا من كام سنة بعربيته البيجو الدكر كان ناقص يقعد على حجري و اما قعدت اكلمه من الشباك و اندهله بصلي ( ايوة بصة الازبهلال الارجواني ) و قاللي اتق الله يا اخي .. عارفين ليه ؟؟ عشان سقف عربيتي كان مفتوح !!! اصل عربيتي عورة
