مشهد داليا و طارق من مسلسل المواطن اكس حلقة ٢٠

مشهد١ - ليل داخلي – مكتب طارق – الصالة

يجلس طارق من امام شاشة الحاسب الآلي و قد توالت التعليقات حول قمع الشرطة و القهر الواقع للمواطنين فيفكر في نفسه بينما تقترب منه داليا

داليا

تؤمر بحاجة يا استاذ قبل ماروح ؟؟

طارق

لا يا داليا متشكر

تقوم داليا بجمع الاوراق و ترتيبها ثم تتنبه لامر ما

داليا

على فكرة يا استاذ .. انا حلمت بيك حلم كده

خير اللهم اجعله خير يعني

ينظر لها طارق بنفاذ صبر

طارق

هاااااا .. انجزي حلم ايه المرادي ؟؟

تضع داليا الاوراق جانبا

داليا

حلمت انك في المحكمة و فيه ناس كتييييير و انت واقف بتترافع

و فجأة صوتك انكتم كده و بقيت مش عارف تنطق

طارق معقبا

يا ستار

داليا

اه و الكعبة المهم يعني فضلت تبص حواليك بتدور عليا مش لاقيني

و بتحاول تقول يا داليا .. يا داليا .. و فجأة .. انا صحيت من النوم

يبتسم طارق لها

طارق

و ده يا داليا تفسيره عندك في خالك الفلسفي العميق مدلوله ايه ؟؟

داليا

ملوش غير مبلول واحد يا استاذ .. ان حضرتك لامؤاخذة

بتبأه محتاس من غيري

يبتسم طارق لها و هو يتناول من علبة سجائرة و يدكها عدة دكات كعادته قبل ان يتناول السيجارة

طارق

انا فعلا يا داليا من غيرك ببأه محتاس

يضع طارق السيجارة في فمه ليشعلها

داليا

بجد يا استاذ ؟؟ يعني انا فارقة في حياتك كده و ليا قيمة ؟؟

طارق

طبعا .. يعني مش كفاية اي سايب قعدتي عالقهوة و الحجر بتاع بالليل

و قاعد معاكي هنا اهه

داليا

مانت يا استاذ اللي بستعر مني .. انا قلتلك ميت مرة قبل كده

خدني معاك عند صحابك و حقعد ساكتة

مش حفتح بقي خالص

طارق

يا داليا صحابي دول دنيا تاني و ناس مش حيفهموا كلامك اصلا

دول عندهم هاللوين و في العيد بيسافروا الجونة و شرم الشيخ

دول بيحتفلوا بالنيو يير .. تعرفي النيو يير يا داليا ؟؟

الحيرة على وجه داليا للحظة

داليا

لا يا استاذ معرفهاش

طارق

دي راس السنة .. بتعملي ايه في راس السنة يا داليا ؟؟

داليا

اه قول كده .. افهم انا .. راس السنة دي امي كانت تعملنا

محشي كرنب و احنا صغيرين بمب بأه و صواريخ

يضحك طارق

داليا تكمل

بس اما كبرت شوية بقيت بنزل الشارع مع صحابي

بنزل اتفرج عالناس في الشوارع .. البنات الحلوة كده اللي مدندشة روحها

و لابسة حتتين قماش بالالفات .. و اقول يالاهوي دانا لو معايا تمن الفستان ده

حوكل امي و اخواتي شهر

يبتسم طارق في اسى

طارق

عايزة تفهميني ان لو معاكي تمنه مش حتشتريه ؟؟

داليا

و دي تيجي يا استاذ ؟؟ ده حتى ربنا يحاسبني

انا كبيري اتفرج و افرح كده لما اشوفهم مبسوطين

بس بزعل لما امي تقوللي انهم كده من بره بس

و اقول يعني معقولة معاهم الفلوس و العربيات دي كلها و مش عارفين يفرحوا ؟؟

الرضا ده نعمة يا استاذ مبيحسش بيها غير اللي زي حالاتي كده واقف يتفرج

يبتسم طارق لها بينما هي تتجه الى خارج المكتب

داليا

استئذنك انا بأه يا استاذ عشان الحق الميكروباظ على اول الشارع

تتجه داليا الى خارج المكتب و يفتح لها طارق الباب

طارق

داليا .. انتي ايه رأيك في موضوع الشرطة ده ؟؟

داليا

رأيي يعني ايه يا استاذ ؟؟

طارق

يعني .. تفتكري اننا فعلا بنعاني معاهم ولا هم صح ولا ايه ؟؟

داليا

دانت بتختبرني شكلك على آخر اليوم !! يا استاذ احنا عندنا امين شرطة

بيقف على اول الشارع اي تكتك معدي بياخده اتاوة

مع السلامة يا استاذ .. تصبح على خير و استغطى كويس

يبتسم طارق لها بينما هي تخرج من الشقة و تغلق الباب من خلفها فيعود طارق نحو الحاسب الآلي ثم يتنبه لهاتفه الذي يرن في استمرارية فيجيب مسرعا

طارق على الهاتف

الو ؟؟ ايوة يا عمي مساء النور .. ايه ؟؟ محمد ؟؟ مين اللي قبض عليه ؟؟

طب انا جايلك حالا .. لا مسافة السكة 

فيرتيجو البطلة ام هي البطل ؟؟

فيرتيجو البطلة ام هي البطل

اللي قرا رواية فيرتيجو عارف ان بطلها اسمه احمد كمال و نوعه ذكر، و اللي مقراش الرواية و شاف المسلسل عارف ان البطل اسمه فريدة كمال و نوعها انثى
الحقيقة ان الرجولة بشكل عام صفة لا تقتصر على جنس محدد و انما عشان حسيت ان فيه ناس كتير عندها اسئلة اكتر قررت اجاوب عليها عن طريق البلوج
ليه حولت البطل في الرواية لبطل ؟؟

لانه مفيش فرق في اي مجتمع متحضر بين البطل و البطلة و ايمانا مني اننا في مجتمع يدعي المدنية و التحضر بينما هو مجتمع ذكوري احيانا متسلط شفت ان التغيير ده حيصب في صالح المجتمع و يخلي الناس تفكر هل احنا فعلا عنصريين في تفكيرنا تجاه النوع ولا لأ

و اكتشفت ايه ؟؟ احنا فعلا عنصريين ؟؟

لا داحنا مش بس عنصريين داحنا مقهورين .. فيه بنات شتمتني على التحويل ده، اه والله فيه بنت حسبنت عليا و قالتلي انا بوظت الرواية و دي وجهة نظرها طبعا بس الاسلوب نفسه حسسني اني شقيت بطن ابن اختها مثلا

ايوة بس فيه ناس بتقول انك عملت كده عشان خاطر هند صبري ؟؟

انا اعرف هند من حوالي سبع سنين و من ساعة ما شفتها وانا مصمم انى لازم اشتغل معاها، هند مجتهدة جدا و اضافة فنية لكن الحقيقة لو التحويل ده مكنش حيضيف للمسلسل ككل و لهند و لينا فرد فرد انا مكنتش وافقت لان آخر حد احب اضره هو اول حد 
احب اشتغل معاه .. و للعلم هند نفسها مكنتش حتوافق لو المشروع مكنش متماسك

طب ليه سلوى خطاب ؟؟ مع ان الدور على الرواية كان اصغر سنا ؟؟ 

ايوة لانه الدور على الرواية حاجة و على الشاشة حاجة تانية .. يعني سعادتك لو بصيت على الدور حتلاقي ان سالي كان فيه بينها و بين جودة علاقة و اتجوزت ممدوح تاجر الاغذية الفاسدة و اشتغلت مع النظام سنوات طويلة و نفسها و من عينها تنهي مشوارها كامرأة لها حقوق و ده يرجعنا لنقطة المسلسل الاولى ان فيه رسالة مجتمعية عن المرأة انا حابب اوصلها في كل الشخصيات النسائية حتى ادوار الممرضات و القهرة الي هما فيها و دور فوزية اللي بتتحكم فيها الوحدة و بتلجأ للارتباط باقل معطيات عشان متحسش انها ملهاش قيمة في الحياة .. قمة القهر المجتمعي للمرأة

طب انت ليه مخدتش الرواية زي ما هي و حولتها نصا ؟؟

عشان العالم بيتطور في صناعة التحول الروائي للدراما البصرية .. النهاردة الانجليز بيحولوا مسرحياتهم و رواياتهم بالانطباع مش بالسرد يعني يشوف انت انطباعك ايه عن الرواية و ينقلك الانطباع مش السرد زي ما هو .. و بعدين بالذات في فيرتيجو لو كنت عملت كده كان المسلسل حيطلع قصير و فيه نقاط ضعف كتيرة
هل ده معناه ان الرواية فيها ثغرات ؟؟

وانت بتقرا مش بتحس اوي في اي رواية ان فيها مشكلة في تسلسل الاحداث لكن لما تيجي تنقل الفكر للدراما لازم تراعي المنطقية يعني مثلا .. احمد كمال في الرواية لما حصلت الحادثة و ودا الصور للجرنال فاتت سنة و بعدين اشتغل في الكباريه .. انا شفت ان دي سلبية شوية من البطل انه متحركش و بعدين ازاي تودي صور زي دي لجرنال و محدش يدور عليك ؟؟ .. انا مش بعتب اكيد على الرواية بس بوضح انه احيانا لازم توجد مبررات .. مش من بتوع شفيق .. للمشاهد

طيب احنا ليه حسينا ان في بعض الاحيان الايقاع وقع شوية ؟؟

عشان انا ركزت ان العلاقات الانسانية بين الابطال هي اللي تكون المحرك الاساسي مش الجريمة لانه لو الجريمة هي المحرك الاساسي فريدة حتقلب شرلوك هولمز و عمر حيقلب واطسون .. وانا مش ده الواقع بتاعي .. اللي كان هاممني علاقة شبه الدنيا على جناح يمامه للاستاذ عاطف الطيب.. ازاي عمر رافض و متدبس و في نفس الوقت فريدة مصرة و عندها اسباب اللي عمر اصلا مقتنع بيها 

ايوة بس ده ايه علاقته بالايقاع ؟؟

علاقته انك مستني مفاجآت و مغامرات طول الوقت و ده مش حينفع يكون موجود على مدار ٣٠ حلقة لانه اصلا الرواية مش كده .. عموما انا اشتغلت بطريقة ٤٤٢ .. و دي نفس طريقة المواطن اكس .. اول عشر حلقات فيهم تصاعد تاني عشر حلقات فيهم ثبات آخر عشر حلقات هم اسرع حلقات و فيهم بتتكشف كل حاجة و سابق و لاحق بأه 

ايه الفرق بين فيرتيجو و مواطن اكس ؟؟ 

زي الفرق بين الموز و المانجة .. الاتنين فاكهة بس مفيش اي علاقة بينهم .. يعني يمكن ان ده تشويقي و ده كمان تشويقي .. لكن طبعا فيه فرق في الطموح و اعتقد ان فيه تركيبات مختلفة من الشخصيات بشكل مجتمعي اشمل و اعم 

انت غاوي ززبنس ؟؟

اطلاقا انا اصلا مبحبش النوعية دي من الافلام .. انا بحب السينما الايطالي و الانجليزي جدا و بعض افلام هيتشكوك مش اكتر لكن في الاصل انا اعز اتفرج على فيلم رومانسي لطيف و احب اكتب النوعية دي انما هي جت كده نصيب .. و يمكن لان ليا علاقة مباشرة بالساحة السياسية في مصر فا تلاقي عندي مخزون من الدراما السياسية 

حسينا انك متك شوية على الاخوان في فيرتيجو .. ده صحيح؟؟

انا مش متك على جهة انا متك على نوعية بشر يعني محمود حسيب بيقلب رزقه و عايز يعيش الراجل .. فا لما لقا ان البلد قافلة في وشه كل باب لجأ للستار الديني انه يشغل الكشك و يقبض شهرية من الشيخ و طمعان في الشقة

مش شايف ان فيه تشبيه مستتر شوية ؟؟

انت شايف كده ؟؟ يبأه هو كده

فيه اسقاطات عدة في المسلسل ليها علاقة بالثورة يعني مثلا لما علاء قال "فجأة حسيت اني زيهم واقف بصقف و بضحك على واحدة و هي بتتسحل " انت قاصد ده ؟؟
اه قاصدها الصراحة عايز الناس تفكر و تربط و فيه فرق انك تقدم عمل عن الثورة و عمل من الثورة .. العمل الثوري ثوري في صناعته من اول الكتابة للتمثيل للاخراج و النهاردة الناس عندها وعي كافي انها تفهم مين بيضحك عليها و مين بيتاجر بارواح الناس

انت شايف ان فيه اعمال بتتاجر بارواح الشهداء ؟؟

خليني ساكت احسن .. بقولك الناس واعية و حتفهم لوحدها .. التجارة و الاستثمار من العمل خالص النية لاحترام الجمهور

طب كلمة اخيرة لمشاهدين فيرتيجو ؟؟

نفسي نستنى .. نفكر .. نشغل مخنا شوية و نجمع رأينا و نقوله باسلوب متحضر لبعض، التعب ده كله عشان نقدم حاجة محترمة .. اعتقد انه اقل واجب الناس تبادلنا الاحترام ده سواء في التعليق او النقد بالسلب قبل الايجاب و كل سنة و حضراتكوا طيبين
أجرى الحوار محمد ناير مع محمد ناير :)))