مشهد ٤ – نهار داخلي – مكتب طارق – المكتب
بداخل مكتب طارق يجلس هو على مكتبه مجتمعا بعبد الرحمن عز و شباب الثوار بينما تجلس سارة من امام المكتب و قد ارتدت بنطلون جينز و بدت اشبه حالا و شكلا بهيئتها القديمة المتمردة
عز
اهم حاجة يا طارق اننا نحدد مطالبنا في الوقفة
عاوزين نكون واضحين
طارق
يا جماعة انا هدفي من ابداية واضح .. قضية قاسم مينفعش تخلص كده
تتدخل سارة
سارة
لا يا طارق .. الموضوع مبقاش قاسم و بس
و انت عارف كويس انهم مش حيعملوا حاجة خلاص
احنا لازم نرفع سقف المطالب
يفكر طارق للحظة
طارق
احنا هدفنا الشرطة يا عز .. عاوزين نطهر الجهاز كله
عاوزين نفتح سجون التعذيب و الاود الحمرا اللي بنسمع عنها
عز
و احنا يا طارق هدفنا الحكومة
عاوزين نسقطها
سارة
و العمال .. حقوق العمال
يتدخل مايكل
مايكل
و الفساد يا استاذ طارق .. احنا كل يوم بيتسرق مننا ملايين
و الناس عايشة بميت جنيه في الشهر
عز
مايكل بيتكلم صح .. مش معقولة يبقوا هما بينهبونا في بلدنا و حقنا
و عايزين كمان يعيشوا على قفانا
طارق
و بعدين يا جماعة ؟؟ ده الموضوع عمال يوسع
سارة
خللي طموحك يكبر يا طارق
دي فرصة مش حتكرر ابدا تاني
عز
يا طارق دي ثورة .. احنا كلنا نازلين و عارفين انها ثورة
تسعل داليا في حرجة في محاولة منها للتدخل فيتنبه لها الجميع ثم ترفع يدها كالطلاب في الفصل طلبا للتدخل
داليا
اقول حاجة يا استاذ ؟؟؟
طارق
عارفة لو قعدتي تحكي في الغاز ملهاش لازمة حوقفك هنا و وشك في الحيطة
تقترب داليا في صمت
داليا
لا يا استاذ انا عاوزة بس اقول يعني .. انه انتوا ماشاء الله اغلبكوا متعلمين و كويسين
و فيه ناس مثلا عندنا في المنطقة لا يعرفوا فيسبوك ولا يعرفوا حتي تلفزيون متشفر
الناس دي ملهاش شغلانة ولا ليها حد يسندها
تقترب داليا منهم اكثر
داليا
مالآخر يا استاذ الناس دي مش حينفع معاها تشيلوا حكومة ولا تحاسبوا الشرطة
مش حينفع معاهم تحاسبوا حرامية ولا تعلقوا المشانق
سارة
امال حينفع معاهم ايه يا داليا ؟؟
داليا
مفيش حل غير انكوا تجيبوا مصر جديدة يا استاذ
هي هي نفس الارض .. بس ناس غير
ناس عايزة تاخدنا في حضنها و تقولنا معلش
اللي فات ده كله كوم و اللي جاي احلى و احسن
تتنهد داليا في حسرة للحظة
داليا
انما تشيلوا و تجيبوا .. خلاص مبقتش تفرق
لا فيه حد بيبص عالغلبان ولا حد ناوي يحب البلد دي
التفهم على وجه الجميع
طارق
انتي عارفة يا داليا انتي عاوزة ايه بكلامك ده ؟؟
داليا
عاوزة حاجة عمرها ما حتحصل .. بس انا لما بفكر في الايام اللي فاتت دي
و في احمد قاسم و في الجروب و في الناس اللي عليه
و فيكوا و في الاستاذة .. بقول مين كان يصدق كل ده يحصل
و ارجع افكر طب و ليه لأ يا استاذ ؟؟
يفكر طارق
طارق
الظاهر ان داليا عندها حق في كل اللي بتقوله يا جماعة
احنا لازم نسقط النظام كله
سارة
ايوة .. السنين اللي فاتت دي كلها
اهالينا مقدروش عليهم احنا حنقدر
يتنهد طارق بينما هو ينظر للحظة خاطفة تجاه العلم المعلق في مكتبه
طارق
و مين عارف .. يمكن فعلا على ايدينا يجي الحق اللي بنحلم بيه
كل مدى بتثبتلى عبقرية النص اللى كتبته ..
ردحذفمرحبا استاذ ناير
ردحذفاسمح لي ان ارفع قبعتي احتراما لموهبتك الفذة و تمكنك من ادوات الكتابة الدرامية, و التي اعادتني رغما عني الى متابعة الدراما المصرية بعد انقطاع لا اذكر مدته,
من الواضح من هذه العينة ان كلام عثمان ابو لبن صحيح حول ان السيناريو سريع الايقاع كما ظهر على الشاشة,
ارجو ان كان ممكنا ان تضع السيناريو كاملا, اعتقد ان الكثيرين سيحبون قراءته, و انا منهم طبعا
مسلسل واحد شحذ فضولي حتى احمل احمل السكريبت هو هاوس, و ذلك بسبب حواراته اللاذعة,الان اجد نفسي راغبة ان استزيد من المواطن اكس كتابة بعد ان شاهدته تمثيلا
بانتظار جديدك, و انا متأكدة انه سيكون على نفس المستوى الراقي الذي يحترم عقلية المشاهد
تحياتي الخالصة, و تحيا مصر
شكرا جزيلا والله .. بكون في منتهى السعادة لما اعرف و اقرا آراء اكتر و موضوع نشر السيناريو كامل ده ححاول اشوف اذا كان ينفع اعمل كده حلقة حلقة عالبلوج
ردحذف:))))
it will be great if you posted the full script,,this part gave me already goosebumps!!love it :)
ردحذف