كان ممكن

كان ممكن احمد يبقاله البصر

كان ممكن مينا يبقاله العلم

كان ممكن الشعب يقول انه انتصر

كان ممكن العسكر ينزل الميدان

كان ممكن اختي تعيش مستورة

كان ممكن قلبك ميبقاش حجر

كان ممكن الناس تشوف الصورة

كان ممكن تفهمني من غير كلام

كان ممكن يكون ابنك يا حاج اللي مرمي

كان ممكن تكون دموعك اللي شايلاه شهيد

كان ممكن تكون دي بنتك يا امي

كان ممكن ترضيلها ابدا الذل و الهوان ؟؟

كان ممكن اكون قاعد في بيتنا دلوقتي ؟

كان ممكن اكون حاسس بداخلية الامن و الامان

كان ممكن اطمن زي ما قالولي و قالولك

كان ممكن افرح و اعيد ان بلادي حرة عالغني و عالجعان

كان ممكن تخلص حكاية شعب في كام يوم عدوا

كان ممكن حيطان الكبت و الجهل و الفقر يتهدوا

كان ممكن القلم يكتب من غير جلاد يحاسبه

كان ممكن السطر يبأه له عنوان

كان ممكن حاجات كتير يا صاحبي

كان ممكن يا ابويا كان ممكن يا امي

كان ممكن دلوقت اكون لسه ماشي على رجلي

كان ممكن اكون شايف بعينيا و و اخدكوا في حضني

كان ممكن اكون زعلان

كان ممكن اكون اي حاجة في الدنيا

بس للاسف انا مش حاسس بنفسي

انا هنا مرمي في وسط الزبالة اسمي مصري

و كان ممكن اكون انسان

محمد ناير