احبك

احبك كما انتي كما كنتي كما ستكونين في يوم من الايام
احبك حقا احبك فعلا احبك بكل ما تحمله الكلمة من معان
احبك لانك احبك لاني اسباب الحب لم يكتشفها بعد انسان
احبك فلا تتبدلي لا تتجملي انتي جميلة كما انتي الآن

احبك لنفسي نعم مغرورة نفسي تريدك لها وحدها دون الناس
احبك لجنونك لشكك و ظنونك و احيانا لغرورك الذي يتألق كالماس
احبك لعينيكي لعطر شفتيكي و لصوتك و يديكي بكل ما فيا من حواس
احبك لهفواتك لاحلامك لحكاياتك حتى و ان لم تعني شيئا من الاساس

احبك فابتسم و تسأليني عن سر ابتسامتي فاكذب في بعض الاحيان
احبك فابكي وحدي ولا تبالي عني و ترحلي عن عالمي دون عنوان
احبك فاغضب و على سفن الوداع ارحل حالفا الا اعود لك و للاحزان
احبك فاتذكر و احاول انكر ان اجمل ما في حياتي هو انتي كما انتي الآن

احبك كما انتي كما كنتي كما ستكونين في يوم من الايام

محمد ناير 

المشاهد المحذوفة بعد ان تم تصويرها من الحلقة الاخيرة من المواطن اكس

مشهد ١٥ – نهار داخلي – المستشفى – غرفة فرح

تنظر فرح في شرود نحو النافذة حتى تتنبه لطارق بصحبة ليلى و هم يدخلان غرفتها فتنظر تجاه طارق

فرح

قبضوا على بابا يا طارق ؟؟

طارق

ايوة يا فرح

فرح

و انا ؟؟ حيعملوا فيا ايه ؟؟

الصمت على وجه طارق و ليلى

طارق

لما تقدري تخرجي من المستشفى .. النيابة حتحولك عالمحكمة

الصمت على وجه فرح ثم تنظر تجاه ليلى و هي تتحسس بطنها

فرح

انا حسميه قاسم يا ليلى .. خلاص انا خدت القرار

من فضلك .. عاوزاكي تاخدي بالك منه

و لما تحكيله عني .. قوليله كل حاجة حلوة في حياتي

اكدبي عليه .. مش مشكلة .. بس متخليهوش يعرف الحقيقة

تربت ليلى على يدها في تفهم

فرح

كان نفسي اعتذر .. بس مش لاقية اعذار خلاص

تبتسم فرح لنفسها و تعود لشرودها نحو النافذة و ضوء الشمس الذي يغمرها

fade to white

مشهد ١٦ – نهار داخلي – منزل عائلة قاسم – الصالة

اضاءة فلاشات التصوير من حول سعاد و صلاح قاسم في وجود سارة و قد بدى عدد من الصحفيين على الارض يكتبون من خلف كلمات صلاح قاسم و سعاد من امامهم بينما العدسات تحيط بهم

سعاد

لما جالي خبر وفاة احمد الله يرحمه .. حسيت انه الوقت وقف بيا

و انه خلاص .. الايام بقت شبه بعض .. لا بأه فيه امل في النهاردة ولا في بكره

لوحدي .. لاقيت نفسي لوحدي .. مش قادرة اسمع غير صوته

و مش عايزة من الدنيا غير اني اشوفه تاني .. ابني

ابني اللي اتهموه انه مجرم و قتلوه في الشارع .. بقيت بسأل ياترى فيه كام واحد زيه ؟؟

و يا ترى حشوفه تاني ولا لأ ؟؟ و حشوفه امتى ؟؟

cut to

مشهد ١٧ – نهار خارجي – فوتومونتاج

حالة الشارع و الهتاف مع شباب الميدان و لقطات لسعاد و هي تقف وسط المتظاهرين في حماس تهتف

صوت سعاد

و اما نزلت الشارع وسط الناس .. حسيت اني ماشية وسط يجي مليون احمد

عينيا مش شايفة غيره في وشوش الناس .. اللي راحوا و اللي اتبقوا وسطهم

شباب صغير بيرمي روحه وسط النار و المية

لقطات للمياه و هي تصد عائلة قاسم و حسام المصري يدافع عنهم

صوت سعاد

و زعلت اوي من نفسي ساعتها ازاي انا ضعفت و نسيت ان ربنا بيسبب الاسباب

و فرحت لما اتآكدت انه جايز ربنا خد مننا احمد

عشان يرجعلنا شعب بحاله

مشهد ١٨ – نهار داخلي – منزل عائلة قاسم – الصالة

الصمت للحظة على وجه صلاح قاسم الذي يكمل من بعد سعاد

صلاح قاسم

احمد الله يرحمه كان عنده امل انه يقدر يغير مننا و هو عايش

كان شايف انه لسه فينا خير

cut to

مشهد ١٩ – نهار داخلي – فوتومنتاج

لقطات لاحمد قاسم وسط اسرته على مائدة الافطار و قد بدت الساعدة عليهم مع شقيقه

صوت صلاح

زيه زي شباب كتير كان بيحاول و كان نفسه في احلام اكبر منه

موقفش عندها و استسلم .. فضل يحاول تاني و تالت

يجرب يمكن في مرة يوصل

لقطات لاحمد قاسم و هو يقدم والدته لمكان القهوة اول مرة في حماس

صوت صلاح

حلم بالارض اللي عشت انا احلم بيها و كان نفسه يكمل طريقي و سكتي

حتى في كسرتي انكسر هو كمان لما عرف ان الارض نفسها هي اللي اتسرقت من ابوه

الحزن على وجه احمد و والده يربت على كتفه وقت الحقيقة و معرفته ان الارض هي ارض الطرابيلي

مشهد ٢٠ – نهار داخلي – قاعة المحكمة

صلاح قاسم يجلس وسط الصفوف بصحبة سعاد و محمد قاسم بينما يقف طارق من امام الهيئة

طارق

الارض يا سيادة الريس اللي الحكومة و النظام السابق خدتها بغير حق

من المهندس صلاح قاسم و اتهمته في ذمته المالية و اضرت ببيته عشانها

ارض البحر الاحمر دي كان المهندس صلاح قاسم ناوي يعمل عليها مشاريع

تفيد مصر .. تفيدنا .. فنادق و قرى .. و مراكز تعليم

انما هما كانوا ناويين يعملوا بيها ايه يا ريس ؟؟ كانوا ناويين يبيعها بالقطعة

يبيعوا بلدنا يا ريس

نظرات عين صلاح قاسم التي تنظر تجاه طارق في سعادة و هدوء و قد بدى محمد يجلس الى جواره و سعاد يتابعان المرافعة

صوت صلاح

انا اتعلمت من اللي حصل لابني .. اتعلمت اني حتى لو كنت في آخر عمري

حقدر اقف تاني و اطلب حقي

يعود طارق نحو مكانه و في لحظة يخطف غمزة تجاه محمد قاسم و والديه في تشجيع و قد بدى عليهم الحماس

مشهد ٢١ – نهار داخلي – منزل عائلة قاسم – الصالة

يجلس صلاح و قد بدت تقاطعات وجهه و حركة شفاهه تنعكس في الضوء الخافت

صلاح قاسم

احمد صلاح قاسم مواطن شاب مصري .. قهره نظام فاسد و لما حاول يهرب من قلب سجن النظام

النظام الفاسد ده اغتاله و قتله و رماه في وسط الشارع لوحده

نفس الشارع اللي اتملا بشباب من سنه .. نفس الشباب اللي خرج من كبته و قهره

من شكوته و حزنه و همه عشان يطالب بحقه .. و نفس الشباب ده هو اللي حيبني مصر

حيبنيها لوحده .. لانه لاول مرة من سبعتلاف سنة .. الارض دي بيحكمها شعبها

من غير سخرة ولا اجبار من غير ظلم ولا استعمار

الارض دي اللي في ايامها الآخيرة حضنت ولادها و هما بيموتوا عشانها

نفس الولاد دول هما اللي دلوقت حيبنوا بكره

مشهد ٢٢ – نهار خارجي – فوتومونتاج

لقطات لطارق و سارة و كريم و ليلى و شريف و حسام و محمد قاسم في قلب الميدان

صوت صلاح قاسم

اللي شاف معانا الميدان .. اللي حضر العزيمة و الآرادة اللي في عيون شبابك يا مصر

اكيد متطمن انه بكره احسن و عارف و متآكد ان ربنا سبحانه و تعالى

بيتولانا برحمته و مش ممكن ابدا الارض اللي ربنا كلم فيها موسى

و حما في احضانها عيسى و وصى عليها محمد .. مش ممكن ابدا بولادها و شعبها

تتذل في يوم او تموت

مشهد ٢٣ – نهار داخلي – منزل عائلة قاسم – الصالة

تبدأ سارة بالكلام في وجه الفلاشات من امامها

صوت سارة

انا رحلتي ابتدت مع احمد قاسم و النهاردة بكمل فصل فيها

و ببدأ فصل جديد من الحكاية .. الحكاية مش مجرد ثورة

ولا هي حكاية احمد قاسم و صحابه لوحدنا

الحكاية اكبر مننا كلنا .. حكاية شعب بحاله

مشهد ٢٤ – فوتومونتاج

على صوت سارة يتقطع شوارع مصر و شعبها في كل مكان بابتسامات الاطفال و الوجوه السعيدة

صوت سارة

حكاية شعب رفض انه يعيش جعان و بلده كلها خير و زرع

رفض انه يعيش جاهل و بلده هي رمز الحضارة و العلم

رفض انه يموت في ذل و هو اصل الكرامة و الشرف

الشعب هو الوطن و الشعب بيبدأ مننا

و احنا كلنا مواطن واحد .. لو شلنا الاسامي من خانة البطاقة

كلنا حنبأه واحد .. المواطن مصري .. اكس

fade to white

مشهد ٢٨ – نهار داخلي – منزل شريف – الصالة

يستعد شريف فيما يبدو للعزال و الانتقال بينما هو يجمع متعلقاته من المنزل و قد حمل كارتونة اخيرة من الشقة بينما يتبعه عمر في سعادة

شريف

يلا يا عمر

عمر

يا بابي انا مش عايز امشي

شريف

و بعدين معاك بأه احنا مش اتفقنا حنروح البيت الجديد ؟؟

عمر

بس انا مش عايز اسيب تيتة و جدو هنا

شريف

متقلقش يا حبيبي هما حيجوا يزورونا .. يلا انزل استناني تحت في العربية

يبتعد عمر في اسى و يتابعه شريف مبتسما في تفهم لحالة عمر الغاضبة حتى يتنبه للكارتونة و ملف احمد قاسم و الصور الموجودة بداخله فيمسك بصورة ليلى للحظة بين يديه مفكرا حتى يتناول هاتفه و هو يجلس على المكتب مفكرا و هو يبتسم في امل ثم يقوم بالاتصال

 

الشيخ سوبرمان

بقالي اسبوع عندي شغل مكثف في ايام متتالية و من كتر الضغط و التركيز كسلت احلق دقني قلت اسيبها تطول و خلاص، فات بتاع عشر ايام و دقني فعلا طولت اوي .. المهم وصلت ليوم الجمعة امبارح و قلت ايه البس هدومي عشان انزل اصلي، فين ايه البس قميص ولا تي شيرت في الجو الغريب ده المهم جبت اي تي شيرت مطبقة في وشي و لبستها و انا عالسلم .. نازل و لسه حخرج من العمارة لاقيتها تي شيرت سوبرمان بتاعتي .. قلت فل يعني مش دي القضية انا رايح اصلي و هدومي كويسة

تعلالي بأه في اللي جاي ده .. من ساعة ما خرجت من باب العمارة لحد الجامع و الناس بتبصلي ولا كأني نازل بلبوص، انا مش فاهم فيه ايه و مش حمشي الطش في ام الناس كلها .. كملت و قعدت وسط الناس في الشارع في مكاني على الحصيرة كالمتعاد حتى استمع للخطبة

فين و فيييين لما خدت بالي ان فيه شاب ملتحي دخل علينا و بصلي بنظرة الازبهلال الاورجواني و بحط ايدي على وشي ادركت ان دقني غالبا اطول منه .. فا قلت في عقل بالي ساعتها اكييييييد لأ .. اكيد موصلناش لسه للتفاهة دي .. هما زعلانين مني عشان انا دقني طويلة و لابس تي شيرت سوبرمان ؟؟؟

قمنا للصلاة و بعد الانتهاء منها كنت ولا عصام شرف لو راح قنا، فرد فرد في الزاوية يجيلي و انا بلبس ام الزفتة الجزمة و اللي يزيد الموضوع انه عندي سبحة صغيرة في العادي انا ماشي بيها اساسا فا طبعا كل الناس بأه ايه جاية تفتي.

١ – رجل عجوز شايف انه يابني ليه متلبسش لباس الحق ( الجلابية ) اقوله ايه ده ؟؟ ده منظر واحد يلبس جلابية مع كامل احترامي لاصحاب الرداء و فضل الرداء في الصيف و الحر .. بس انا مبحبهاش

٢ – راجل معاه ابنه فرحانين اوي انه عادي يعني سلفي و بيلبس سوبرمان و اكيد حافظ القرآن كمان فا ابو الولد كان مبسوط و سعيد و ابنه مبقاش بيخاف من الراجل ابو دقن الحمد لله

٣ – شاب قاللي بيس

٤ – شاب بصلي ازبهلال ارجواني تاني و مشي

٥ – طفل صغير اصر اني اعديه الشارع عشان خايف يعدي لوحده

بعد ما وصلت للبيت قعد افكر .. احلق دقني ولا اسيبها .. و القرار كان اني حسيب دقني و البس هدومي عادي انا معنديش بنطلون بيبين لباس و معنديش قمصان محزقة ولا تي شيرتات عليها ستات عريانة ولا جزمة اميجو بتنور، طب ليه لأ ؟؟ ما افضل سايب دقني و البس محترم و عادي زي كل الناس مش يمكن كده اقدر اوصل رسالة انه الملتحي ده بني آدم مش عفريت و لو ان فيه منهم عفاريت بيبصوا بصة الازبهلال الارجواني

الاسلام يا خوانا جماله انه ملوش وسيط يعني منك لربنا، اي طرف تالت او واسطة تملي عليك الحق ليس له الحق بالامر و النهي عليا خلاص هو له ينصحني و يقول كلمته و شكرا .. بعد كده انا حسابي مع ربنا .. دقني طويلة معنديش دقن المهم اني بحترم الناس في الشارع .. طب ده فيه واحد راجل لابس بأه جلابية و دقنه نصر متر و كسر عليا من كام سنة بعربيته البيجو الدكر كان ناقص يقعد على حجري و اما قعدت اكلمه من الشباك و اندهله بصلي ( ايوة بصة الازبهلال الارجواني ) و قاللي اتق الله يا اخي .. عارفين ليه ؟؟ عشان سقف عربيتي كان مفتوح !!! اصل عربيتي عورة

دفاتر الزهق

محبوس بين اربع حيطان و راسي لسه مشوشرة

و صورتي في المراية مكسورة متغيرة

انا مكنتش ولا كنت انا هان عليا ولا هنت

انا حبيت و جبت آخري ولا في الحب جبت ورا ؟؟

دفاتر تليفوناتي مقطوعة ملهاش كمالة

نمر صحابي خفت منها صاحبت صاحب البقالة

بقينا ندردش من غير هدف و من غير حوالة

و الحالة ؟؟ بقيت الم من نافوخي الزبالة

في وسط الورق و الدفاتر لاقيت حكاية متشخبطة

كنت ماشي كنت خايف و كانت هي مستعبطة

الوحدة لما تخطف ترمينا وسط اللخبطة

تعشم فينا نهرب وسط الفرح و الزأططة

و فجأة تهد فينا و نلقا الايدين في الاماني متشعبطة

فكرت فيها و قلت جايز بس خفت من وحدتي

و افتكرت معرفش ليه لما قالت جدتي

اللي يجري على قديمه بيكح من ترابه

يدور وسط البيوت و ميلاقيش للحب بابه

و اه من عذابه .. و اه من وحدتي في سكتي

اسامي من الحروف تتلخبط بالظروف

و تكره لو تشوف غيرها مترتبة

بتعجب من روحي لما بتوه في قلب لمة

و عيني تروح عليها و اقول هي المقصدة

و اكرمش ورق دفاتري و اكتب من عشمي سطري

و استنى لو حيكمل و مالوش كمالة عندي

و ترجع الوحدة تاني و كأن فاتت ثواني

في وسط الورق و الدفاتر حكاية متشخبطة

الوحدة لما تخطف ترمينا وسط اللخبطة

و ادور عليكي وسط الدوشة و الملل

احلى حاجة فيكي ان سكوتك حسه عالي

بتتكي عاللي فات فيا و فين ما قلبي بيوجعه

بشخبط على الحيطان اسمك مالزهق

كلمت كل النمر يمكن صوتك اسمعه

محبوس بين اربع حيطان و راسي لسه مشوشرة

و صورتي في المراية مكسورة متغيرة

انا مكنتش ولا كنت انا هان عليا ولا هنت

انا حبيت و جبت آخري ولا في الحب جبت ورا ؟؟

قصيدة الولد

شالت شال الحيا و كفت كفوف السخرية .. قالت نكتة بايخة ضحكتها .. لاجل ما انط في عبها

بتلوم عليا ليه لما المجاملة متأصلة في قلب كل مقصلة تقطع ايدين و رقاب اللي يشدها

سحبت سحابة صيف على شجرة لمون كانت هنا .. كنا في عز الحر بنتسخبى تضلنا

بس قالتلنا يوم ما يموت الزرع الاخضر ماتجوش تبكوا الوبا .. خليكوا بتجروا جري الجهل و الغبا

عايزين من كل واحد فيكوا استاذ مسخرة .. يرقص و يكتب نكت عاللي قدام و ينسى ورا

عايزين من كل واحد فيكوا كداب عايزين ممثل عايزين مغني عايزين شيخ و قسيس بتوع جواب مش ثواب

اصل في ارضكوا سفر السفالة طالب عمالة و آدي الشروط في الاستمارة

اللي منكوا بجح و سافل كفاية مكانه محفوظ شرط البلطجة و السرقة يكون امارة

يا خسارة .. الارض دي كانت رمز الشرف و الطهارة .. بقت اشرف مهنة فيها الدعارة

انتي مين يا ست انتي و جاية بتحكي في ايه و ليه ؟؟

شكلك مش غريب عليا كنتي زمن ورق قلبوكي معدن رخيص اسمك و صورتك دي عليه

معقول تكوني بلادي ؟؟ معقول تكوني ام جدي و ولادي ؟

ليه وشك صبح عجوز ؟؟ ليه ضاربة في وشي بوز ؟؟

زعلانة ليه قوليلي دانا شهيدك حبيبك واقفة ليه في عز الضلمة وحدك تنادي ؟؟

اه يا بلادي .. مشيت شوارع كنت فيها في يوم شوارعي

كنت صايع كنت ضايع كنت كل يوم بسب فيكي و العن كنت بحرق سجايري

يوم ما قلت لابويا الحق البيت بيتحرق .. العمر يابا بيتسرق .. قالي ده دلع مرء

خير .. كله خير بس انت تيجي تحت الشمس و تشتغل .. لسه بكره فيه الف امل

فين يابا ده الامل ؟؟ قطعوا الاحمر و الابيض و الاسود و شالوا النسر و جابوا جمل

خير يابني .. هو انت لسه متعرفوش ؟؟ مش واقف شايف من مطرحه ؟؟

كف الاذى عنك و عن اخواتك و استشهدوا .. لو كانوا ماتوا في البحر ولا في شوارع هو ادرى بجنته

و آدي يابني حكمته .. سره فيها برحمته و حريته .. ساب اخوك راقد في السرير و انت منتاش الاخير

تحرير .. شفت في وشك كل خير .. و خير .. حشوف وشك تاني و تالت بخير

بكره الحمل يكون علينا اكبر كتير و اللي قال لأ و اللي قال اه يعرف انه الدم واحد و الحمل واحد

و ازاي نسكت على الفرقة و التفريق و ربك في السما .. واحد

و كل جاحد .. من سرق و من هرب مين باع البلد و مين كدب لو تموت بحسرتك في ايدك فنجان قهوتك

سهرت و تعبت و ذاكرت .. لا تلعن فجر ولا تلعن وقت .. كله في الآخر بيصب في عهد

يا تلحق الزرع الاخضر قبل ما يموت في ارض .. يا اما يابني غيرك حيقلب دينه علينا فرض

اه يا بلد .. انا الولد .. انا اللي سكت لما قاله بكره يجي الهدد .. اه يابلد .. جايلك .. متخافيش

سكتونا بالحريق و بالغرق و بالحشيش .. كممونا بالرغيف و بالمسرطن و بالعسكر و الحلاليف

محروق ابوهم كلهم .. غرقان و بشرب دمهم .. و اللي يهمهم معدش يهمني

ارضي عليا و قوليلي لسه بتحبني ؟؟ شيلي شال الحيا و خديني في حضنك و كفي البكا و الدموع

ابنك خالف يرجع شبابك و عرض اهلك المقطوع .. مسموع .. صوتك في كل مدنا و كل جرس

كنايس مساجد معابد كله بيجري على زمامك زي الفرس .. شيلي شال الحيا و احضنينا كلنا

و اللي يقع وسط الطريق نفديه بروحنا و دمنا يا امنا ياللي انت بلادنا وحدنا حبينا زي ما كانت مصر بتحبنا

محمد ناير 

Somewhere

The regular uncertainty of the human soul is a regular pattern to the universe, always the same question of why, the eager curious question of when, the surprised reaction to a catastrophe of what.

imagine your there, somewhere, imagine your most perfect harmony of life, close your eyes, now please, close your eyes and think of such place wherever it is, the beach ?? the desert ?? a mountain high ?? the skies or space ?? and your there, a soft tinted music playing ?? is it the beatles ?? possibly a song from your childhood, the one you cant get out of your head every morning as you wake up, add your contents, add joy add laughter, add rain if you wish or the sun, the moon as well, feel like nature see a plant or a tree an oasis possibly, think of sounds that add to the song and feel the void for a minute, now you need people, family maybe ?? loved ones ?? lost friends ?? add them as well to this beautiful painting, and pause.

as we pause life here we see the faces some are astonished of why they are here, others are happy asking how ? some are not really fulfilled in your dream asking why ?? why space ?? why beach ?? why not an oasis ?? while some as well asking what ?? what happened ?? what happened to life as we know it ?? your somewhere becomes else where, and your perfection becomes a distant closer to reality, while you realize you cant live somewhere without others, and you may chose one or two but by time you come to the fact that the human factor, the human stain is there.

we all ask the same questions out of fear. thats the difference between heaven and hell, we live in hell called life in heavens we have no questions cause we have no fear, its all up to you to chose, the hell of unanswered questions or heaven of soul content. 

بسم الله الرحمن الرحيم

حتى الآن و الى تلك اللحظة الاغلبية العظمى من الشعب المصري تعاني من حالة تعجل و استعجال مباشر للامور، دون النظر للحالة العامة التي تسببت فيها ثورة الشعب في الشهور الماضية، من المنطقي و الطبيعي ان كبت مثل هذا الكم من المشكلات و التحديات و المطالب طوال سنوات مصر الاخيرة يؤدي الى انفجار شعبي و تعددية في الافكار قد تصل الى حد التراشق اللفظي بين اطراف نفس جهة النزاع كما حدث من مؤيدي و معارضي حوار د/علاء الاسواني و الفريق احمد شفيق حيث وقع انقسام معنوي وصل انه البعض يتهم الآخر بعدم الرباية و قلة الآدب

بغض النظر عن سطحيات الامور تلك ان ما يحدث في مصر الآن هو مقدمة لثورات عدة و لسنوات طويلة في البحث عن الحرية، و المشكلة الكبرى من وجهة نظري المتواضعة هي سرعة و استعجال البحث عن دواء للعرض قبل معالجة المرض نفسه، زي بالظبط الحملات الكتير اللي بتنزل بتاعت يلا نبني مصر .. ناقص يزودولها بأه عشان الاستعطاف .. يلا نبني مصر بأه .. بليز .. ارجوكوا

لابد و ان ندرك اننا في مرحلة فاصلة قد تكون الآخيرة في بناء مصر الحديثة و بعيدا عن الانتماءات الدينية و الاهواء و الاحلام في النهاية ما سيحدث هو حتمية الامور و اللي له شوية في قراءة الدين و متابعة تاريخ اللاهوت ( ده بجد انا مش بهرج ) حيعرف ان كل ده موجود و مشار اليه، المهم يعني اننا عشان برضه الناس اللي بتسأل هو حيحصل ايه في المرمة دي كلها !! تعالوا نسترجع امر في منتهى البساطة

ثورة عام ١٩١٩ قامت تلك الثورة بسبب الاحكام العرفية التي تم فرضها من الانجليز على مصر و رفض بريطانيا مشاركة مصر في مؤتمر باريس مما دفع القائد و الزعيم سعد باشا زغلول و معه محمد محمود و اسماعيل باشا صدقي و حمدي الباسل للوقوف امام المجلس العسكري البريطاني في مصر و تم القبض عليهم الاربعة فخرج الشعب المصري كله ينادي بالاستقلال ( خد بالك من كله دي ) و كانت تلك هي المرة الاولى التي تشارك فيها المرأة برأيها في مظاهرات و تخرج للشارع

ان نتائج ثورة ١٩١٩ تم التحصل عليها بعد ثلاث سنوات من المجلس العسكري البريطاني و تم اعلان مصر كدولة مستقلة لها دستور تحت سيادة الحكم البريطاني و اختصارا للوقت ظلت مصر طوال ثلاثون عاما تعاني من طفيليات الحكم البريطاني على مصر حتى انقلاب الجيش المصري عام ١٩٥٢ و قيام ثورة يوليو و الجلاء في العام التالي، ثم استقلت مصر سياديا و اقليميا بعد حرب ١٩٥٦

طبعا ليس الغرض من الكلام ده كله انه الناس تلطم و تقول يا نهار اسود احنا قدامنا كل ده في غياب امن و غياب مطافي و فتنة طائفية و ناس واقفة في الميدان و ناس قاعدة تحت الكوبري .. و انما انا بس حبيت اوضح ان التغيير في عمر الاوطان عمره ما بيجي في شهرين ولا تلاتة ولا سنة لانه لو كان ينفع التغيير يجي في الفورتي فورتي كده و لو كنا كلنا نزلنا الشارع ( راجع حديثي عن ثورة ١٩١٩ ) كنا زمانا شكلنا لجان عامة و عملنا حزب واحد انما انت لو جيت تبص للامر حالا دلوقت حتلاقي سبعتاشر حزب ( هم بجد سبعتاشر) و حتلاقي كل فرد في المجتمع المصري رأيه غير اخوه و ان كان يتفق معاك ان مبارك ده كان زفت مما أدى الى المليونية اللي كانت في التحرير و في مصر بشكل عام، اما المطالب الفئوية الحالية و هي بالمناسبة مطالب صحية و طبيعية في ظل ظروف التغير الحالي عاملة زي ما يكون بابا بقاله سنين و قارفنا و فجأة قال انا مستعد اعمل لكل واحد اللي نفسه فيه فا كل واحد بيجري و نفسه في حاجة مش واخد باله ان وراه بيت بيتهد و ان كان في لحظة فارقة المفروض يتعظ و يتوقف، الحديث عن الثورة المضادة في رأيي هو شماعة ليس اكثر ولا اقل لتبرير تصرفات البعض من اميين الثقافة في هذه البلد و ان كان طبعا لازم نعترف انه فيه فلول للنظام بتفرفص في مكانها بس انا اعتقد انه صفوت الشريف قاعد عالكبانيه دلوقت قبل ما يكون قاعد في مكتبه بيدير حملة شن الثورة المضادة

الخلاصة ان ثورة ٢٥ يناير هي في تقديري الشخصي بداية جديدة تماما لعهد آخر و اللي لسه بيفكر زي ما كان بيفكر يوم ٢٤ يبأه غلطان و اللي لسه عاوز ينزل يعيش حياته كما كانت يبأه برضه غلطان، اعتقد انه هذه الثورة هي ايضا الاولى في عدد متتالي من ثورات قادمة منها تصحيح و منها اقصاء حتى نصل الى مصر الحديثة التي تستحق و ان تكون اغنى و افضل دولة في العالم ليس بالاماني وانما لانها كذلك فعلا

الحمد لله رب العالمين

ارجو ان اللي يعجبه كلامي ينشره عالحبل